UKIWA MTU WA KIPEKEE/WA TOFAUTI.

Umewahi kujiuliza ni kitu gani cha pekee ambacho kinakutambulisha katika jamii unayoishi?. Kuna watu katika jamii yoyote wanakuwa maarufu kwa tabia au matendo ya tofauti, wakati mwingine wanapewa mjina ya utani kutokana na matendo au tabia hizo. Ukiwachunguza kwa makini hata katika utendaji wao wa majukumu mbalimbali huwa ni wa tofauti sana na watu wengine, wao mara nyingi huwa na upekee katika mambo yao. Je, wewe utofauti wako ni upi katika matendo, mawazo, na malengo yako?

Katika nyakati hizi ambazo utandawazi na tekinolojia vimetawala sana, habari na taarifa zinaenea kwa haraka sana na kufanya mambo mengi kuwa ya wazi zaidi, ushabiki wa watu maarufu umeongezeka na kuenea sana. Katika mambo ambayo yameenda sambamba na kuenea na kukua kwa utandawazi ni KUIGA/KUFUATISHA. Watu wengi wamekuwa wakifanya mambo kwa kuiga au kufuata watu maarufu au watu wengine wanaowaamini, muda mwingine mpaka watu wanashindwa kuwatofautisha kuanzia mavazi mpaka matendo mtu anaiga.

Kuna usemi niliuandika katika somo la MAMBO MUHIMU KWAKO KIJANA WA LEO unaosema Albert Einstein aliwahi kusema “The woman who follows the crowd will usually go no further than the crowd. The woman who walks alone is likely to find herself in place no one has ever been before” (mwanamke anaefuata kundi hawezi kwenda mbali zaidi ya lile kundi. Mwanamke anaetembea pekeake anaweza kufika mahali ambapo hakuna mtu aliewahi kufika pale kabla). Angali watu waliofanikiwa wengi walifanya mambo ya tofauti nay a kipekee; Mfano tajiri wa kwanza duniani kwa sasa aliamua kuacha chuo cha Harvard (moja kati ya vyuo bora duniani) mwaka 1975 akiwa na miaka 20 na kuanza kujihusisha na mambo yake mwenyewe. Hivyo ili ufanikiwe lazima ufanye kitu ambacho ni tofauti na wengine na utafika mahali ambapo wengine hawajafika na hayo ndio mafanikio.

Katika jamii yoyote kuna mtu anaefahamika sana kutokana na umbo lake (Mnene, Mfupi, mweupe kuliko wote n.k) au kutokana na matendo yake, tabia yake ya kipekee na kadhalika. Ukiwa kipekee lazima watu watakufahamu popote uendapo, kile kitu cha kipekee kitakuwa ni alama ya utambulisho wako kwa wengine. Kufahamika ni moja ya nyenzo au silaha muhimu kwa mtu unaeanza kupigana kuelekea mafanikio yako. Kumbuka lazima uwe mtu wa pekee ili uweze kufahamika na kujenga heshima katika jamii yako.

Mtu yeyote katika dunia anakuwa na malengo na ndoto ambazo anapenda zitimie, ndoto ulizonazo wewe hazifanani na ndoto za mtu mwingine hata kama mtafanana malengo yenu. Kila mmoja anafikiria na anafanya juhudi ili kuifikia ndoto yake ya maisha. Ndugu, ukiishi kwa kuiga anachofanya mtu fulani huwezi kufikia ndoto yako ya maisha, utaishia kupotea kwakuwa huyo unaemfuata matendo, tabia au ratiba yake hujui ndoto yake wala fikra zake. Unahitaji kuishi maisha yako halisi, ufuate ndoto yako na hapo utaona namna unavofanikiwa na kufikia ndoto zako. Ili utimize ndoto na malengo yako lazima uiishi nafsi yako kuanzia matendo, tabia, na ratiba yako. Lazima uthamini mawazo na fikra zako mwenyewe, lazima uwe na mtindo wako.

Vijana wengi kwa sasa wamerundikana katika fani za usanii na utumbuizaji, hata vijana wengine wenye elimu ya juu waliokosa ajira wamekimbilia huko. Baadhi ya vijana wamebaki mitaani wakisubiri kazi huku wakijiuliza VIPAJI VYAO NI VIPI??. Haya yote yanatokana na kuishi maisha ya kuiga au kufuata mtu Fulani, huenda kwa sasa humfuati wala kuiga mtu yeyote lakini kuna mtu ulikuwa unamfuata na sasa unatambua umeshapoteza njia kuelekea kwenye ndoto na malengo yako. Huwezi kutambua kipaji chako kama unaishi kwa kumfuata maisha ya mtu mwingine, lazima utapotea na ukija kutambua umeshachelewa na umri  umeenda. Ishi maisha yako ishi nafsi yako ili uweze kutambua na kumudu kipaji chako.

Ben alikuwa ni mwanafunzi katika shule moja ya sekondari ambae alikuwa na malengo na ndoto zake za kutimiza katika maisha yake. Shule hiyo ilikuwa ni ya bweni akawa akiamka asubuhi saa kumi alfajiri anaenda darasani na kusoma hadi saa kumi na mbili anarudi bwenini na kujiandaa kwaajili ya kuingia darasani kama wanafunzi wengine. Hiyo ikawa ndio ratiba yake ya kila siku, lakini kila siku akiingia darasani saa kumi alfajiri alikuwa anamwona kijana mmoja anajisomea, akajua huyo mwanafunzi anajisomea masomo ya shule hivyo hakumfuatilia kwakuwa yeye alikuwa akijisomea vitabu vya masomo ya maisha hasahasa vitabu vya ujasiriamali, ufugaji na kilimo cha kisasa. 

Siku moja Ben aliamka alfajiri na mapema na kwenda darasani kama kawaida yake alipofika hakumwona Yule mwanafunzi aliezoea kumwona anawahi kila siku, lakini Ben hakujali alifungua kitabu chake na kuanza kusoma. Nusu saa baadae Yule mwanafunzi aliingia na kumkuta Ben alishawahi kufika, alipita alipo Ben na kumpa salamu na kwenda kukaa kwenye kona ya darasa kama mazoea yake ya kila siku. Ben aligeuka kumwangalia vizuri Yule mwanafunzi sio kwamba alikuwa hamfahamu, la hasha kuna kitabu alimwona amekibeba na kilikuwa ni moja ya vitabu anavyovitafuta sana. Aliamua kusimama na kumfuata Yule mwanafunzi na kuanza kuzungumza nae. Kila mmoja akatambua malengo ya mwenzake kuwa nje ya masomo muda wa alfajiri wote huwa wanajisomea masomo ya ziada, ukawa ni mwanzo wa wao kuwa na ukaribu kuazimana vitabu na majadiliano ya maada mbali mbali. Kwa sasa Ben anamiliki kampuni ya kusindika mzao mbalimbali na rafiki yake ni anamiliki kampuni ya usafirishaji aliyorithi kwa baba’ke.

Umejifunza nini katika hadithi hii fupi?

Ukiishi maisha yako halisi na kufanya juhudi za kufikia malengo yako, katika harakati zako utakutana na watu wanaoendana na malengo yako, utakutana na marafiki ambao wanafanana ratiba na malengo, hiyo itakusaidia kukupa moyo na kukutia hamasa ya kuzidi kusonga mbele.

MAWAZO, MALENGO NA JUHUDI PEKEE HAVITOSHI KUTIMIZA NDOTO ZAKO,
TANGULIZA SALA KWA MUUMBA WAKO.