KUGHAIRISHA KWENYE FAIDA

Kughairisha mambo ndio tabia ambayo inaongoza kusababisha watu wengi kutofikia malengo yao kuliko tabia nyingine yeyote, pia tabia ambayo ni ngumu sana kuiacha kama umekwisha kuwa nayo. Kughairisha mambo hutokana na sababu mbalimbali, sababu kuu ikiwa ni kukosa motisha au msukumo wa ndani yako kufanya jambo, pia sababu nyingine kubwa ni kutopangilia mambo yako binafsi.

Watu wengi sana huamini kughairisha ni kitu kibaya kabisa katika maisha, jambo ambalo sio kweli. Uzuri au ubaya wa kughairisha hutegemea jambo unaloghairisha, wakati unaoghairisha, na sababu ya kughairisha. Mara nyingi kughairisha hugharimu pale unapoghairisha kwa kutojisikia kufanya jambo bila sababu yoyote (uvivu wa kufanya).

Je, unawezaje kupata faida kwa kughairisha?

Mwandishi Brian Tracy katika kitabu chake cha Eat that Frog anasema, Kila mtu hughairisha lakini kinachotofautisha kati ya watu wanaofanikiwa na wasiofanikiwa ni katika mambo wanyoghairisha, wengi wasiofanikiwa hughairisha mambo ambayo huchangia 80% ya maisha yao, wakati wale wanaofanikiwa hughairisha mambo ambayo huchangia 20% katika maisha yao.

Mara nyingi mambo amabayo ni ya muhimu sana huwa na vikwazo na ugumu katika kuyafanya hivyo usipokuwa na msukumo kutoka ndani ya nafsi yako ni rahisi kughaili na kukimbilia katika mambo ambayo yana umhimu kidogo katika maisha yako na mara nyingi mambo haya huwa rahisi na yasiyo na vikwazo katika kuyafanya.

Ili uweze kutumia kughairisha kwenye faida katika maisha yako ya kila siku kwanza unahitaji mambo yafuatayo:- 

• UTAMBUA MAMBO MUHIMU KATIKA MAISHA YAKO.

Jitambue kwanza wewe ni nani? Lengo lako hapa duniani ni lipi? Na unaelekea wapi?

Kisha orodhesha mambo/shughuli za muhimu ambazo zitakufikisha zitakupeleka huko unakotaka kufika. Mambo ambayo yanachangia asilimia 80 ya maisha unayotaka kuyaishi hayo ndio mambo muhimu, haya ni mambo ambayo ni ya kuyapa vipaumbele ukilinganisha na mambo mengine.

• RATIBA YA SHUGHULI ZAKO ZOTE.

Kuwa na ratiba ya shughuli zote unazohitaji kuzifanya katika siku, wiki na mwezi. Ukishaziorodhesha shughuli zote, unatakiwa kuzipanga shughuli hizo kwa mtiririko kulingana na umuhimu, uhitaji na uharaka wa shughuli hizo. Shughuli za muhimu na ambazo zinahitajika kukamilisha haraka zikae mwanzoni na zile ambazo hata ukikosa muda unaweza kufanya siku inayofuata zikae mwishoni mwa orodha.

• KUWA NA UTARATIBU MAALUMU WA KUPOKEA MAMBO.

Je, ukipewa taarifa au jukumu la kufanya ambalo hukuliweka kwenye ratiba unafanyaje? Au rafiki yako akikupa taariafa ya kukutembelea ghafla unafanyaje? Lazima uwe na utaratibu maalumu ambao hata watu wengine yaani ndugu, jamaa na rafiki wanatambua kuwa nikitaka kumfuata Fulani natakiwa kufanya hivi kabla. Kwa kifupi usiwe mtu wa ndio kila wakati. Kwa upande wa dharura ambazo ni za muhimu sana lazima uwe na uratibu wake pia. Ni kawaida katika maisha kutokea dharura na mara nyingi dharura hutukuta tukiwa hatujajiandaa, lakini pia ni muhimu kupima dharura hizo hivyo unatakiwa kuwa na utaratibu maalumu wa kupokea.

Hivyo katika kughairisha kwenye faida, ukiwa na mambo mawili au zaidi ambayo yanahitajika kufanyika kwa wakati mmoja, kitu cha kwanza unaangalia je lipi ni jambo ambalo ni muhimu zaidi kwako?, cha pili ni je jambo lipi liko kwenye ratiba yako? (Kati ya lile lililopo kwenye ratiba na lile lililokujia kama dharura lipi la muhimu zaidi kwako katika maisha), cha tatu je, utaratibu wako wa kupokea jambo kama hilo ni upi?

Unaweza kughairisha kwenda matembezini kwasababu rafiki yako amekuja na anataka msome pamoja kitabu kipya alichokuletea, Lakini pia mwingine anaweza kutokughairisha kwenda matembezini kwasababu anaenda kufanya utafiti wa biashara mpya katika matembezi yake, hivyo akamkatalia rafiki yake kwakuwa kusoma kitabu hakukuwa kwenye ratiba yake.

Maisha ni jinsi wewe mwenyewe unavyoyapangilia na kuyaishi.

Kila la kheri katika shughuli zako za kila siku,

USICHOKE KUJIFUNZA.