MOJA YA MAMBO YA KUZINGATIA UNAPOPANGA RATIBA YAKO

Kuna mambo mengi madogo madogo lakini ya MUHIMU katika kutimiza mambo yako ya kila siku, mambo hayo wengi hawayatilii maanani aidha kwakuwa hawajui umuhimu wake au wanayapuuza. Mimi huwa namfananisha mtu mwenye ndoto au malengo kama DEREVA na ndoto yake au malengo yake ni kama MZIGO ambao inabidi aufikishe sehemu husika. Kila Dereva huwa anatamani awahi kufika anakoelekea ili apate mshahara wake, shauku ya zawadi au mshahara wake ndiyo inayomfanya afanye juhudi kwa nguvu na ujuzi alionao ili afikishe mzigo kwa wakati mwafaka. Lakini njiani anazingatia alama mbalimbali za barabarani zinazomuongoza afike salama.

Hata katika maisha yetu kuna mambo mbalimbali tunayotakiwa tuyatumie ili kufika salama na pia kwa wakati, mambo haya yanatupa tahadhari juu ya yaliyo mbele yetu.

Je, katika mipango yako ya maisha iwe biashara, kilimo, Elimu, Sanaa yako huwa unahusisha na taarifa za utabiri wa mamlaka za sekta husika. Wewe ni mkulima je unafuatilia matangazo na tahadhari zinazotolewa na mamlaka ya hali ya hewa pamoja na idara ya masoko?. Je wewe mfanya biashara mara unafuatilia mabadiliko ya bei na taarifa nyingine muhimu kutoka mamlaka ya masoko? Je wewe mwanafunzi hiyo kazi unayosomea miaka kadhaa ijayo hali ya ajira itakuwaje?

Watu wengi huwa hawaoni umuhimu wa mambo haya lakini kwa mtu ambae uneapanga mipango yako vizuri na kwa ustadi lazima uzingatie mambo haya ambayo yatakufanya upange njia mbadala ikiwa mambo yatabadilika tofauti na ilivyotegemewa. Mkulima ili ufanikiwe lazime ulime mazao yanayoendana na taarifa za kiasi cha mvua kinachotegemewa kwa mwaka huo. Vile vile mfanya biashara lazima ujue bidhaa gani inayoendana na hali ya hewa inayotarajiwa ndani ya mwezi au wiki ijayo.

Lakini taarifa hizi pia zinaweza kutumika kwaajili ya mipango ya mda mfupi, au ratiba yako ya kila siku. Unapanga safari lakini je umefuatilia hali ya hewa kesho itakuwaje ili ujiandae vizuri, au una mpango wa kumtembelea rafiki yako mshauriane kuhusu maisha je, unaangalia hali ya hewa ya kesho itakuwaje au unasubiri uahirishe ratiba yako baada ya kushuhudia hali ya hewa mbaya? Wengi hupuuza mambo haya na kuchukulia kuwa ni mambo yasiyo na umuhimu. Unapopanga kupeleka bidhaa yako sokoni au eneo lililo mbali na eneo lako je unafuatilia bei elekezi za bidhaa hiyo kule unakopeleka.

Kama unahitaji kufanikisha mipango yako basi lazima ujiandae kukabiliana na kuendana na hali halisi ya kesho, panga ratiba yako vizuri ili usiwe mtu wa kuahirisha mambo. Tumia vyombo vya habari kama vile magazeti, redio, televisheni n.k kupata habari na matukio yanayotarajiwa katika sekta uliyoilenga wewe.

KUMBUKA: Mafanikio yako yanachangiwa na mambo madogo madogo unayoyafanya kila siku, hivyo kila jambo lichukulie uzito wake.